FA’AMANUIA LE PALEMIA I TAUMAFAIGA UMA A LE EKALESIA WORSHIP CENTRE WORLDWIDE

Afioga ile Tamaitai Palemia o Samoa

Tusia: Tusiga Taofiga

O lo’o fa’agasolo i lenei vaiaso le Fonotaga Tele a le Ekalesia Aoao a le Worship Centre Worldwide i le lalolagi atoa, e pei ona talimālō ai Samoa.

Ua o gatasi lea Fono Tele, ma le mae’a lelei o le galuega tele, o le malumalu tapua’i autū o le Ekalesia i Sogi, o se fiafiaga sili lea i le pāia o le Ekalesia auā ua i’u manuia lenei taumafaiga sa fītāituga i ai i le tele o tausaga ua mavae.

I le savali iā Keriso, sa fa’ataunu’uina i le Aso To’ana’i o le vaiaso ua mavae, na momoli ai le fa’afetai fa’apitoa a le Mālō e tauala atu i le afioga i le Palemia, Fiame Naomi Mataafa, a’o se fa’amanuiaga fo’i mai lana afioga, ona o le agaga kerisiano o lo’o fa’atupulā’ia pea, i loto ma fa’amoemoe o tatou tagata Samoa.

Na momoli ai le meaalofa tupe e $5,000 a le Mālō mo le Ekalesia, fa’atasi ai ma le $5,000 o le taulaga a le afioga i le Palemia iā Fiame Naomi Mataafa.

I le saunoaga a le Ta’ita’i o le Mālō, e tusa o lea fa’amoemoe, na ia fa’ailoa ai le tāua tele o le sao o le Worship Centre Worldwide i le fafagaina pea o agaga o tagata Samoa e ala i le ‘upu fa’aleagaga a lo tatou Matai Sili o i le lagi.

“O lea ua suluia ulufanua i le mālama o lenei taeao fou, ae gāfoa le ata ma totogo a’e le sau o lagī e puaina mai le soifua laulelei o si o tatou atunu’u. O le asō, e mafua ona o le Atua. Ua tini ma taunu’u le fa’amoemoe na tu’ulagi, ona o lona fa’amaoni. O le mea lea, tatou te molimau fa’atasi, e lelei, e lelei lava le Atua.

“Lau Susuga i le Ta’ita’i o le Sauniga, le pāia i le nofo a fa’afeagaiga, fa’apea tulaga tofi mamalu o le Ekalesia Worship Centre Wordwide, aemaise le pāia mauāluga o Samoa ua o tatou fai taulaga fa’atasi i lenei taeao, ou te fa’atalofa atu.

“O lea ua tu le failā, auā le ‘ala ma le mila, o le mauga pāia o le Atua e tapua’i ai lana fanau. O le vi’iga ma le fa’afetai e fo’i i le Atua, auā o lea ua o tatou patipatia le fa’ai’uga manuia o lenei galuega tele.

“Ou te mautinoa sa tau fuafua ma fa’atatau lenei fa’amoemoe i le tele o tausaga, talu ona fa’avae le Ekalesia, ma sa outou momoli i le Atua le mana’oga mo se malumalu tapua’i. A lea ua taunu’u i le taeao nei. O ai ea na mafua ai? O le Atua fai vavega lenā, o ia na foa’iina le tamāo’āiga ma le sosia i o outou ‘ā’ao.

“Ou te fa’afetai atu i le Ta’ita’i o le Ekalesia, aemaise le soifua finafinau o le Susuga i le Aposetolo iā Viliamu Mafo’e ua fai i lagi le folauga, ma le loaloa o le Ekalesia aoao. O lo outou soifua ofoina atu e auauna i le Atua, e leo tele i le tino mai o lenei galuega. E i ai fa’afitauli, e lē taugofie, atoa ai ma le tele o taimi na mo’omia e fa’ataulagaina mo le galuega. Fa’afetai le fa’atoatoa, fa’amālō le faitaulaga.

“O lea fo’i e usu mai i Samoa nei le Fonotaga a le Ekalesia ma fa’amoemoe e tofia ai lo outou Ta’ita’i.

“Ou te tatalo, ia ta’ita’ifono le Agaga Pāia, auā o Ia o lo tatou fesoasoani sili, e a’oa’o, fa’atonu ma ta’ita’i tatou i mea tonu uma lava, e ala iā Iesu Keriso.

“E avea ai a’u nei ma sui o le tatou Mālō, e momoli atu ai fa’amanuiaga mo le fa’alagamaea a le Ekalesia, e ala i lana fonotaga i lenā vaiaso fou. Ia manuia le tofiga o le Susuga i le Ta’ita’i o le Ekalesia. O le tatalo, ia manuia le galuega, ma ia so’ofau le ta’ita’iga o le Ekalesia e pei ona fa’avaeina ai.

“E fa’atāua pea e le tatou Mālō le tapu’eina o le soifua tapua’i o Samoa i lo tatou Atua. O Samoa o le atunu’u Kerisiano, ma e lē se’e ‘ese a’u nei ma le Faigāmālō i le fa’asinomaga a lo tatou Fa’avae, ‘E fa’avae i le Atua le Mālō Tuto’atasi o Samoa’.

“O le laolao fo’i lenei ou te momoli atu ai le fa’afetai tele i le pāia o le Ekalesia i lo outou fai tatalo mo le Mālō ma si o tatou atunu’u. Tatou te lē mafaia se mea, pe afai e lē auai mai le Atua.

“E fa’apei o la Iesu ‘e lē mafai e lālā o le vine ona fua, pe afai e lē pipi’i i le vine’.

“Le pāia e, o le vasega o Fa’afeagaiga ma Tiākono, o le ‘au tatalo ma le vasega o Misionare o le Ekalesia, tatou fa’amalolosi i lo tatou valā’auina ma le poloā’iga tele ua tu’uina mai mo tatou, ina ia papatiso atu i le Suafa o le Tamā, ma le Alo ma le Agaga Pāia, ma fai nu’u uma lava ma so’o.

“Ia manuia le loaloa o le Ekalesia i tagata lotu uma i Samoa nei ma atunu’u e mamao. Ia fa’amanuia mai le Atua i le tatalaina o lenei galuega tele aemaise le tofiga o le Ta’ita’i o le Ekalesia Aoao, fa’apea le fonotaga a le Ekalesia i le vaiaso fou.”

Mo le silafia, ua mae’a tofia le Ta’ita’i fou o le Ekalesia Worship Centre Christian Church Worldwide, e pei ona filifilia ai le susuga i le Fa’afeagaiga iā Aposetolo To’outa Aloali’i e sui tulaga i le afioga iā Aposetolo Viliamu Mafo’e ua tu’umālō.

O Aposetolo Aloali’i, o le Fa’afeagaiga Sinia mo lana Ekalesia Worship Centre i Melepone i Ausetalia.

Ata Pu’eina: Leota Marc Membrere

Source – SAVALI NEWSPAPER

1 thought on “FA’AMANUIA LE PALEMIA I TAUMAFAIGA UMA A LE EKALESIA WORSHIP CENTRE WORLDWIDE”

Leave a Comment

Your email address will not be published. Required fields are marked *

19 − 15 =

Scroll to Top